ఆడియో వేడుకలో చెప్పుల్లేకుండా హీరోయిన్

హీరోయిన్లు ఒక ఈవెంట్లో పాల్గొనడానికి ఎంతగా తయారై వస్తారో తెలిసిందే. గంటలు గంటలు తయారై వచ్చే వాళ్లు.. ఏ చిన్న విషయంలోనూ తేడా రాకుండా చూసుకుంటారు. మీడియా కెమెరాలన్నీ వాళ్ల మీద ఫోకస్ చేస్తాయి కాబట్టి ఏ చిన్న లోపం ఉన్నా హైలైట్ అయిపోతుంది. ఐతే తాజాగా ‘నీవెవరో’ ఆడియో వేడుక కోసం  హీరోయిన్ రితికా సింగ్ చెప్పులు.. షూలు ఏవీ లేకుండా రావడం అందరినీ ఆశ్చర్యపరిచింది. హీరోయిన్ ఇలా వచ్చేసిందేమిటి అంటూ అందరూ చెవులు కొరుక్కున్నారు. చెప్పులు తెగిపోతే బయటే విడిచి పెట్టి వచ్చేసిందా అన్న సందేహాలు కలిగాయి. కెమెరాలన్నీ ఈ విషయంపై దృష్టిపెట్టాయి.

ఐతే అసలు విషయం ఏంటంటే.. ఈ వేడుకలో పాల్గొనడానికి ముందు రితిక వేరే ఈవెంట్లో పాల్గొంది. దానికి స్పోర్ట్స్ షూస్ వేసుకుని వెళ్లింది. ఆ తర్వాత ఈ వేడుకకు అవతారం మార్చుకుని వచ్చింది. ఆమె వేసుకున్న డ్రెస్ మీదికి స్పోర్ట్స్ షూస్ అసలు సెట్టవ్వవు. దీంతో వాటిని విడిచి పెట్టాల్సి వచ్చింది. ఇక షాపింగ్ కు వెళ్లి అప్పటికప్పుడు హై హీల్స్ కొనుక్కుని రావాలంటే ఆలస్యమయ్యేలా ఉండటంతో చెప్పుల్లేకుండానే వచ్చేసినట్లు సమాచారం. ఈ విషయంలో ఏ మొహమాటం లేకుండా ఉత్త కాళ్లతో నడిచి ఈ ఈవెంట్ కు రావడం గొప్ప విషయమే. ‘గురు’ సినిమాలో డేరింగ్ లేడీగా అందరినీ ఆకట్టుకున్న రితిక.. ఇక్కడ కూడా తన డేర్నెస్ చూపించింది. ‘గురు’ తర్వాత ‘శివ లింగ’ సినిమాతో తెలుగు ప్రేక్షకుల్ని పలకరించిన రితిక.. కొంచెం గ్యాప్ తర్వాత ఈ చిత్రంలో నటించింది. ఈ సినిమాలో ఆమెతో పాటు ఆది.. తాప్సి కీలక పాత్రలు పోషించారు. ఈ నెల 24న ‘నీవెవరో’ ప్రేక్షకుల ముందుకు రానుంది.